30 факти за 2022 и честитка за 2023 година од Претседателот на КФСМ

Почитувани куглари, почитувани кугларски работници,

Факт е дека 2022 година беше една од поуспешните кугларски години во изминатиот период. Заеднички успеавме да направиме малку, за многумина, согласно условите, многу. Небитно. Годината 2022 ја испраќаме, а нашиот фокус треба да биди 2023.

Што не очекува и како јас како претседател на КФСМ ја гледам престојната 2023 година:

1. Нови предизвици околу деблокирањето на жиро сметката на КФСМ и подигнување на личната и колективната свест на секој чинител да помогне согласно своите можности. Потребна ни е несебична поддршка и надминување на гледиштата само на својот интерес туку потребна ни е култура и негување на колективниот, заеднички интерес. Очекувам да има изговори многу, но немаме време веќе за тоа, нас ќе не интересираат само дела и само тоа ќе биде вреднувано. Немаме ниту време за задоволување на лични суети. Само и само не интересираат конкретни идеи и дела, комплетно завршени работи, а не половични, ни треба конструктивна критика, критика која ќе не направи подобри. Најповикани, секако членовите на Извршниот одбор на КФСМ.

2. 2023 година ќе биде година на волонтерска работа, како и неколку години после тоа. Тоа е реалност и треба да биди прифатена од сите нас. Секој од нас ќе треба да поклони од своето време, од својата енергија, од своите финансии. Колку сме побројни во оваа идеја, толку ќе бидеме и поуспешни. Само сами можеме да го решиме деценискиот проблем. Да направиме натпревар кој повеќе ќе придонесе и ќе помогне, како позитивен пример за останатите.

3. Славиме 50 години откако постои Федерацијата, токму оваа 2023 година. Мораме да ја направиме првата Монографија на македонското куглање. Помогни, придонеси, биди проактивен да успееме во она што 50 години никој не го направил. 

4. Ќе учествуваме на СК во Ријека. Најдобрите поединци од државните првенства. Ќе учествуваме и на СП во Вараждин. Најсилните и највештите куглари и кугларки. Воопшто нема да биде лесно, ниту финансиски, ниту логистички, ниту кугларски, но со заеднички сили и помош ќе успееме од секого од нас да се извлече својот максимум. Спортските резултати и очекувања во едни вакви услови е неблагодарно да ги поставиме превисоко, но личните очекувања дека секој го дал својот максимум треба да бидат подигнати како никогаш до сега. Спортот е токму затоа убав, бидејќи можни се и невозможните нешта. 

5.  Во Скопје мораме да организираме училишна, средношколска и универзитетска лига. Истото важи и за Битола. За Струга,  согласно условите ќе пробаме да го овозможиме тоа. Никој не ни очекува дека ќе биди лесно или евтино или едноставно. Напротив ќе биде многу тешко, но можно е, Битола е доказ за тоа.

6. Клубовите доколку немаат услови значително да помогнат финансиски на КФСМ, лично сметам дека ќе треба да се откажат од  меѓународните настапи во 2023 година и да ослободат средства како би помогнале на Федерацијата за веќе од 2025/26  година федерацијата да биде во кондиција да им помага на клубовите. Секој изминат ден (3650 дена досега) со блокирана сметка е на штета на самите клубови. Ќе мора да бидеме свесни дека  една ваква жртва ќе биде од голем интерес на секој член на било кој од македонските клубови гледано на долгорочни стази, во интерес на сите сегашни и идни репрезентативци, кугларски школи, клубови, општо на македонското куглање. Да не чекаме подобри времиња, тоа се само бледи изговори. Тоа го знаеме и го чувствуваме на сопствена кожа веќе цели 10 години.

7. Очекувам во натпреварувачката 2023/24 година, да ни се приклучат уште 2-3 нови правни субјекти во МКЛ. Ни требаат и тоа е во интерес на постоечките клубови. Бидете храбри и одлучни и постапете што побрзо во реализација на оваа идеја.